Буриад, Монголын хамтарсан уламжлалт “Эв модны наадам” энэ жил ОХУ-ын Буриад улсын Түнхэн аймгийн Кырен хотод зохион байгуулагдаж, баярын арга хэмжээнд манай аймгийн төлөөлөгчид амжилттай оролцоод ирлээ.

“Эв модны наадам”-ыг хил залгаа Буриад улсын Түнхэн, Ахын аймаг, Хөвсгөл аймгийн Ханх сум ээлжлэн зохион байгуулдаг уламжлалтай бөгөөд энэ жил Буриадын Түнхэн аймаг өөрийн үндэсний “Сур харваан” наадам, “Хонгодор буриадуудын 3 дугаар их уулзалт”-тай хамтатган 6 дугаар сарын 23-27-ны өдрүүдэд зохион байгуулсан юм. Баярын арга хэмжээнд Буриадын Түнхэн, Ахын аймаг, Эрхүү мужийн Аларск, Нугутскийн районууд, хот тосгодоос 1500 гаруй хүн оролцсон бөгөөд манай аймгаас ИТХ-ын дарга Б.Пүрвээ, аймгийн ЗДТГ-ын дарга Г.Төмөрбаатар тэргүүтэй, төр захиргаа, урлаг соёлын байгууллагуудын төлөөлөл бүхий 27 хүний бүрэлдэхүүнтэй баг амжилттай оролцоод ирлээ.

Баярын үеэр эрийн 3 наадам, хөл бөмбөг, гар бөмбөг, хөнгөн атлетик, хувцас загвар, ая зохиогчдын зэрэг олон төрлийн  урлаг соёлын арга хэмжээ, уралдаан тэмцээн болсон бөгөөд аймгийн ХДТ-ын “Чингүнжав” амьд хөгжмийн хамтлаг бүрэн хэмжээний тоглолтоо Буриадын ард түмэнд өргөн барьж, олны талархлыг хүлээн зохион байгуулагчдын зүгээс цом, өргөмжлөлөөр шагнуулсан þì. Мөн тус хамтлагийн хөгжимчин н.Отгон “Шилдэг ая зохиогч”-ийн тэмцээнд дэд байрын шагнал хүртэж, цом, өргөмжлөл, мөнгөн шагнал хүртсэâ.

Наадмын төгсгөлд хөрш 3 аймаг “Эв мод”-оо салгах ёслол үйлдэн, ирэх жилийн баярыг зохион байгуулах эрхийг Буриад улсын Ахын аймагт шилжүүлэн өгснөөр баяр наадмын үйл ажиллагааг өндөрлөлөө.